Biografija ministerskeho prezidenta

Michael Kretschmer so 7. meje 1975 w Zhorjelcu narodźi; je nan dweju synow. Po šuli absolwowaše wukubłanje elektronikarja za běrowowu techniku a po druhim kubłanskim puću zdoby sej zrałosć za fachowu wysoku šulu. Wot 1998 do 2002 studowaše hospodarske inženjerstwo na Wysokej šuli za techniku a hospodarstwo w Drježdźanach a 2002 studij jako diplomowy hospodarski inženjer zakónči.   

Swój puć do politiki nastupi Michael Kretschmer jako měšćanski radźićel swojeho ródneho města Zhorjelca wot 1994 do 1999. Mjez 1993 a 2002 skutkowaše w krajnym předsydstwje Młodeje unije Sakskeje a Delnjeje Šleskeje. Dnja 23. apryla 2005 wuzwolichu Michaela Kretschmera za generalneho sekretara sakskeje CDU; w tutym zastojnstwje bu wospjet wobkrućeny. Wot 9. decembra 2017 je předsyda sakskeho krajneho zwjazka CDU.

Prěni raz bu Michael Kretschmer 2002 jako direktny kandidat w Zhorjelskim wólbnym wokrjesu do Zwjazkoweho sejma woleny, kotremuž do lěta 2017 přisłušeše. Wot 2005 do 2009 běše naměstnik předsydy dźěłoweje skupiny kubłanje a slědźenje frakcije CDU/CSU w Zwjazkowym sejmje. Wot 2009 do 2017 bě Michael Kretschmer zastupowacy předsyda frakcije z dźěłowymi wobłukami kubłanje a slědźenje kaž tež wuměłstwo, kultura a medije. Po wólbach Zwjazkoweho sejma 2013 hač do septembra 2017 bě Michael Kretschmer tež předsyda sakskeje krajneje skupiny frakcije CDU/CSU w Němskim zwjazkowym sejmje.

Dnja 22. awgusta 2017 bu Michael Kretschmer za prezidenta Zwjazka sakskich ludowych uniwersitow z.t. woleny. Nimo toho so w spěchowanskim towarstwje Wjercha Pücklery park angažuje.

Dnja 13. decembra 2017 bu Michael Kretschmer za ministerskeho prezidenta Swobodneho stata Sakskeje woleny.